سوف نتناول في هذا الموضوع طريقة تحضير كحك العيد في البيت بالمقادير والمواصفات.
المقادير
- دقيق 1 كيلو
- سمنه نص كيلو
- سكر معلقتين كبار
- بيكنج بودر معلقه صغيره
- خميره معلقه كبيره او قطعة خميره فريش في حجم عين الجمل
- محلب محمص معلقه كبيره
- سمسم محمص 1 معلقه كبيره
- مستكه ٤ فصوص
- سمسم معلقتين كبار
- ماء دافئ كوب الا ربع
الطريقه
- ننخل الدقيق ونضيف له معلقة سكر و البيكنج بودر
- ونخلط معهم السمسم
- نحمص المحلب مع السمسم نتركه يبرد ثم نطحن معه المستكه
- نضيف الخليط السابق إلي الدقيق
- نسخن السمنه ( نسيحها مش نقدحها ) ونضعها علي الدقيق ونبسهم مع بعض كويس ونتأكد اننا شربنا الدقيق كله بالسمنه
- نذيب معلقة السكر التانيه ماء دافئ ومعاها الخميره يتفاعلو سوا
- نعجن الدقيق بالماء بخميره ونخدمهم في العجن جيدا, خفية الكحك ونجاحه بتعتمد علي خدمتك في العجن
- نشكل العجين ونحشيه بالملبن بدون أي إضافات نقطعه زي الصورة كده ( لو بتحبوه بالمكسرات كسرو مكسرات مشكله ونزود علي الملبن معلقة سمنه ونخلطهم سوا ونحشي بيهم الكحك ) لو بتحبوه محشي وننقشه بقي حسب زوقنا.
- في حالة ان احنا عاجنين ب خميره فوريه نسويه علي طول في الفرن ولو عاجنين ب خميره بيره نسيبه ساعه يتخمر.
- لما يبرد نضعة في علبه محكمة الغلق ووقت التقديم نرشه بالسكر البودرة ونخلط مع السكر معلقة نشا علشان يثبت اكتر.
- الأفضل نرش السكر وقت التقديم فقط.