العيال والقرآن - الجزء الثالث - العناد عند الأطفال💀
نبدأ بسم الله ❤️
1- 📚 نفذنا الخطوات السابقة لكن الطفل مش راضي يحفظ😑.
نفذنا الخطوات الموجودة في المقاللات السابقة لكن الطفل مش راضي يحفظ يبقى غالبًا ابنك كبر ومحتاج شغل جديد وتجديد في الخطاب الديني 😀, … لكن كيف؟
ذيادة وتكثيف الحواديت المتعلقة بالقرآن وفضله وفضل أهله - تابعي المقالات جاية- ليل نهارًا قيامًا وقعودًا وعلى جنوبهم بمناسبة وبدون مناسبة ❤️ وتكرار عليه أهداف حفظ القرآن.
نماذج حوارية تحميسية، يتم التنويع بينها كل مرة:
* عارفين ليه يا ولاد بعض العلماء قالوا إن عدد درجات الجنة بعدد آيات القرآن؟
عشان النبي قال "يُقَالُ لِصَاحِبِ الْقُرْآنِ : اقْرَأْ وَارْتَقِ وَرَتِّلْ ، كَمَا كُنْتَ تُرَتِّلُ فِي الدُّنْيَا ، فَإِنَّ مَنْزِلَكَ عِنْدَ آخِرِ آيَةٍ تَقْرَؤُهَا"، فقال بعض العلماء "إذن آخر درجة عند آخر آية في القرآن". وعشان كدة عاوزين نحفظ القرآن.
* عارفين يا ولاد ليه بنتعب عشان نثبت الحفظ كتير؟
عشان نضمن نسكن إن شاء الله في أعلى درجة دي في الجنة، إللي فوقيها على طول عرش الرحمن، بحيث يوم القيامة لما ييجي علينا الدور في التسميع نسمَّع بسهولة وما ننساش ولا آية وما نقفش، عشان كل مرة بنقرأ ونسمَّع آية بنطلع درجة، فلما نوصل لآية "من الجِنَّةِ وَالنَّاسِ" نبص يمين وشمال نلاقي النبيين والصديقين والشهداء وأبو بكر وعمر وأمهات المؤمنين وغيرهم من أهل الدَّرجاتِ الُعُلَى، "وحسُن أولئك رفيقا"، يعني أحسن ناس نقعد معاهم يا ولاد ❤️ ، طب لو نسينا الحفظ يوم القيامة؟ هنقف طبعا 😕 .. طب لو وقفنا؟ هي دي الدرجة إللي هنقف عندها في الجنة، إلا طبعا لو فيه عمل تاني ربنا كتبنا بسببه من أهل الدرجات العُلَى بفضله ورحمته ودي حاجة في علم الغيب - وإللي مش هينسى هو إللي تعب في المراجعة.. وعشان كدة هو يستحق الفضل الخاص دة جدا ❤️ … متخيلين يا ولاد قمة الإحساس باللذة والمتعة وإنت عمال تقرا بصوت جميل أحلى كلام في الوجود وكل ما تقرا تطلع سلمة وتقرب أكتر من أحلى نعيم وأحلى صحبة أكتر وأكتر ❤️.
* إوعى تقول لي طب مش مهم أي حتة في الجنة جميلة وخلاص يا ماما إنتي قلتيلي إن الجنة مفيهاش زعل خالص.. عشان هقولك النبي حبيبك قال "فَإِذَا سَأَلْتُمْ اللَّهَ فَاسْأَلُوهُ الْفِرْدَوْسَ" دي الجنة العليا إللي موجودة فوق كل الجنات ومنها بتتفجر أنهار الجنة كلها ❤️. وشفتوا النبي قال إيه؟ قال: يقال لـ"صاحب القرآن" ❤️ … أيوة إنت يا حبيبي، ومش هتبقى صاحبه إلا لو حطيته ف عينك وقلبك كل يوم وطبقت نصايحه ❤️.
* مش كفاية إن ربنا يكتب اسمنا في اللي اختارهم لحفظ كلامه وفي اللي اختارهم لرفع الإثم عن الأمة وتحمل الفرض عنها في فرض الكفاية دة؟
* مش كفاية إنك لما ربنا يسألك يوم القيامة ضيعت عمرك في إيه، ترد تقول "في حفظ كلامك يا الله وترتيله وتطبيقه"؟
* طب مش ساعات وإحنا في الشارع أو في العربية بتسألنا على مصحف تقرأ فيه بس مش بيبقى معانا؟ مش لو إنت حافظ القرآن هتعرف تقراه ف أي وقت من قلبك ومش هتحتاج مصحف؟ ❤️
* طب مش كفاية إن ربنا يقول عنك "من أهلي وخاصتي"؟ خواص خلق الله عند الله يا حبيبي هم المقربون.
* مش إنت بتحب الملايكة ونفسك تبقى معاهم؟ طب النبي قال إن اللي بيقرا القرآن ويحفظه مشبَّهٌ بالملائكة الكرام حملة الوحي وسفراء الله تعالى إلى خلقه "مع السفرة الكرام البررة".
* هو إحنا نطُول إن دستور ربنا "الحكيم الخبير" يبقى في قلوبنا محفوظ نرجعله في أي لحظة بسهولة ف وقت المشاكل والخوف والضيق والحيرة والفتن، ونلاقي فيه الحل فورًا؟
* يعني لما تكبر كدة وتلاقي عندك في الشغل فيه اختلاط و "نفسك" بتقولك اقعد معاهم هتلاقي القرآن اللي ف قلبك ينور لك بالآية " وَلا مُتَّخِذَاتِ أَخْدَانٍ"/"وَلا مُتَّخِذِي أَخْدَانٍ".
* طب قاعد لوحدك و محدش شايفك و"نفسك" بتقولك اختلس من مال الشركة قرآنك المحفوظ في قلبك هيقولك "يستخفون من الناس ولا يستخفون من الله" ويقولك "ومن يتق الله يجعل له مخرجًا ويرزقه من حيث لا يحتسب"
* طب وقعت ف ذنب كبير و لقيت حد جابلك إحباط و يئسك من المغفرة هتلاقي قرآنك المحفوظ ف قلبك بينور ويفكرك بالآية "قل يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا".
* معقولة العيلة كلها يبقوا حافظين القرآن وإنت الوحيد إللي تبقى مش حامل للقرآن!!
* اجعله يؤم أصحابه في البيت في الصلاة.
* يمكن ان نوصي شيخ التحفيظ ف المسجد ان يخصص له حلقة أطفال تحت مراقبته -تسميع فقط بدون تجويد, هيكون حافز بتشجعه جدًا.
2- 📚 مازال الطفل مصمم يوقف الحفظ والمراجعة😑.
وبيقول لك ليه تخليني أحفظ غصب عني؟
وتلاقي حد راح متدخل بالتعليق اللطيف "إنت كدة هتكره الولد في القرآن 😣".
وابنك ما هيصدق يمسك فيها بقا ويكررها كل شوية 😃😕.
* الرد بيكون عمرك ما هتقدر تكره القرآن لإنه جميل ومش بيكرهه إلا الكفار والمنافقين بس، وإنت مؤمن وبتحب ربنا وبتحب كلامه. ولو كرهته والعياذ بالله فإنت الخسران مش القرآن ولا إحنا.
* ولو هجر القرآن هتديله درس ف إن القرآن عزيز "وإنه لكتاب عزيز" "والله الغني وأنتم الفقراء"، وإن هو الخسران ببعده عن القرآن، "وإن تتولوا يستبدل قوما غيركم ثم لا يكونوا أمثالكم".. وبراحتَك خالص يا حبيبي، انا وأخوك هنكمل وإنت هتبقى من اللي النبي قال عنهم "إن قومي اتخذوا هذا القرآن مهجورا"، وتتركة يحاسب نفسه شوية بدون ما تدخل معاه ف جدال منهك ومن غير ما تفحميه وتجبريه بالرد على الحجج كلها لإنه ممكن يعاند.
* كل ما يعمل سلوك غلط مثلًا يكون ردك هو "طبعًا ماهو بسبب بُعدك عن القرآن أخلاقك بقا فيها خلل"...😃.
* بعد فترة يسمع تشجيعك وتسقيفك لأخوه فيغِير ويتحسر–عادي وطبيعي "وفي ذلك فليتنافس المتنافسون", هنا تنتهزأقرب فرصة وتبدأ معه ❤️ .. يلا استعيذ من الشيطان وتعالى معانا".
* وحاول فورًا تحل المشاكل والصعوبات اللي مواجهاه.
3- 📚 تتناقش معه لماذا الحفظ صعب.
هتتناقش معاه ليه الحفظ صعب عليه؟ وتحاول توصلوا لاتفاقات مُرضية وملائمة لطبيعته.
نماذج للحلول
أ- بالنسبة للتجويد.
طالما ابنك عنده صعوبات وتعثر فعلاً في الحفظ ودة بيخليه يزهق خلي وقت التسميع مفيهوش تجويد، سريع - وخلي التجويد له حلقة خاصة بيه، ولو يومين في الأسبوع فقط ، ولا تقلق: إحنا شخصيا أتقنا التجويد على كبر، وهو بكتر السماع هيلقط أسرع مننا، تخفيفك عنه هيخليه ينجز وبالتالي يتفاءل ويتحمس,
طب لو سأل ليه ما ينفعش نلغي التجويد تمامًا؟
هتفهمه إن دة عشان تلاوته كما أُنزل فرض عين على كل مسلم.
ب- بالنسبة لأخطاء التشكيل.
هتفهمه إنه له أجرين مش أجر واحد، كل مرة يقرأ و يتعثر نطقه, "وَالَّذِي يَقْرَأُ الْقُرْآنَ وَيَتَتَعْتَعُ فِيهِ وَهُوَ عَلَيْهِ شَاقٌّ لَهُ أَجْرَانِ", أجر القراءة وأجر المشقة, وهتفهمه الفرق بين اللحن الجلي واللحن الخفي
لحن يعني خطأ، جلي يعني ظاهر، خفي يعني خفي
وهتفهمه إن التشكيل من الأخطاء الجلية, الأطفال بيحبوا المعلومات الجديدة جدًا, وهتفهمه إن كلام الله ما ينفعش نغير فيه حرف عمدًا وإلا نبقى بنحرف القرآن زي ما اليهود عملوا, لكن تطمينا له هنعتبر الخطأ في التشكيل مش محسوب في العداد، لإنه لو اتحسب في العداد هيقربه من إعادة التسميع أكتر وهو بيعاني أصلا 😕، فمش هنحسبه لكن لازم نقف عند الخطأ ونصححه طبعًا😃.
جـ - بالنسبة لصعوبة الاحتفاظ بالحفظ فترة طويلة والنسيان.
أولا: نتفق على الكمية المناسبة لقدراته.
ثانيًا: نحدد مقدار الخطأ المسموح به قبل الاضطرار لإعادة التسميع, ونتساهل في المعايير دي حسب الظروف, مثلا نجعل المسموح به في الوجه/الصفحة هو غلطتين أو ثلاثة فقط. أكتر من ثلاثة؟ يتم اعادة التسميع.
وهنبدأ نستعيد المنسي دة بالسماع.. شغل قرآن في البيت كتييير ليل نهار، خصوصًا الجزء اللي نسيه، وياريت مصحف معلم لو بيحب ترديد الأطفال، لو مش بيحب خلاص شغل الشيخ ماهر معيقلي أو الشيخ قطامي أو الشيخ مشاري، بحيث يكون سماع بصوت جميل يشده ويقلده ويتغنى بالآيات.
أخيرًا: هتستعين بالنقطة الجاية في تحميسه.
طبعًا لو أخين وبيسمعوا لبعض، هتتابع الأمور أسبوع مثلاً لحد ما ياخدوا على القوانين ويستتب الأمن، وبعد كدة هيبقى ماتش ودي في أغلب الأوقات بعون الله 😃.
في الدراسة لو بيحفظ كل يوم خلي الحفظ أجازة يومين - مثلا خميس وجمعة - لكن نتفق إن المراجعة عمرنا ما بناخد منها أجازة.
4- 📚 الضجر من كثرة توقيفة بسبب التجويد.
الإستياء من توقفيه كتير في التجويد فبينسى الحفظ أوبسبب ان أخوه بيوقفه كتير في الآيات والتشكيل فبيغلط فبيضطر يعيد أوبسبب حفظة السيء فبيضطر يعيد أوبسبب كان حافظها ونسيها فبيضطر انه يعيد؟ أي حاجة فيها "بيضطر انه يعيد" هتلاقيه جايلك منفجر في العياط عشان إعادة التسميع هتضيعله ربع ساعة كاملة من وقت اللعب 😃.
أولا وأخيرا دة شعور طبيعي، ما تحسسهوش إنه فجر ونافق على طريقة "نافق حنظلة" 😕 .. قلنا طبيعي لإنه طفل وعاوز يخلص ويلعب.
اجعله يستعيذ من الشيطان طبعًا وقول له بعض الآيات مثلا "إنما الحياة الدنيا لعب ولهو" و"ما عندكم ينفد وما عند الله باق" مثلاً.
ثانيًا: هتفهمه إن هو الكسبان بالتكرار لإن دي كلها حسنات والحرف بعشرة، وهتحتاج تقربله مفهوم الحسنات دة بشكل حسابي بحت،
تجيب الفقرة إللي هيعيدها، وهتخليه يعد بصباعه هي فيها كام حرف - لو نفَسُه قصير خليه يعد الكلمات مش الحروف واعتبروا عدد حروف تقريبي وثابت للكلمة - ثم هتضرب الرقم في 10، هيطلعلكم رقم مذهل، إوعى تستهين بأي حسنة ، إنت يمكن تحتاج حسنة واحدة بس تنزلك من على جبل الأعراف يوم القيامة لو كنت من أهل الأعراف والعياذ بالله واشرح القصة طبعًا وربنا لما يلاقيك من أهل القرآن ممكن يتضرب لك الرقم في 700 كمان والله يضاعف لمن يشاء, واحكيله هنا حكاية السنابل إللي في سورة البقرة وكلنا عارفينها.
ثالثًا: اغلط ساعات في التسميع قدامه عشان توريله حرصك على اتقان السورة.
رابعًا: هتقنعه مرة أخري إنه لو كرر كتير يبقى الحفظ هيثبت وهييجي يوم قدام شوية مش هيحتاج يراجع كتير.
5- 📚 لو حدث مشاجرة بينه وبين اخوة اثناء التسميع.
لا تفرقهم عن بعض، دة باب رائع لتعويدهم على التعاون على البر والتقوى.. طب الحل؟
بيتعصب على أخوه وهو بيصححله التسميع
قول له: "لا هات المصحف أنا إللى هسمعله أنا.. أنا إللى هساعده عشان ربنا يساعدنى، و انا إللى هاخد الحسنات على كل حرف عشر حسنات.. مش إنت إللى هتاخد دة كله لنفسك. طبعًا هيقول لأخوه: "لأ أنا إللى هسمعلك!".
ونضيف بعض قوانين لفض النزاعات:
لو المشاجرة بسبب خلاف في التسميع
- إللي ماسك المصحف لازم تعتبره زي شيخك ما تغلطش فيه واتعامل معاه بأدب واحترام متبادل.
- أخوك إنسان كريم لإنه موقّف حفظه ومأخر لِعبه عشان خاطر إنت تسمّع حفظك وتخلص وتلعب زيه، مفروض تشكره بدل ما تتشاجروا…
- أخوك لو قال لك وإنت بتقرأ "لأ غلط والصح كذا وكذا",
لو إنت كنت قلتها أصلا صح؟ قل له ببساطة أنا قلتها،
وأخوك مش مفروض يقول لك لأ إنت ما قلتش، إنت صادق بس ما وضحتش صوتك❤️.
لو المشاجرة بسبب إن واحد منهم بيخلص ورده أسرع من التاني ومش بيسيب للتاني فرصة يمسك المصحف
دي فروق فردية متوقعة طبعًا.
هتقنع الأبطأ (المتضايق) إن أحسن إن أخوه يخلص خالص ويسيبه عشان يعمل ورده بتركيز وهدوء.
وهتقنع السريع إنه لو أخوه هيسمّع نص صفحة فقط أو صفحة مش ربع زيه يعني ولازم يصبر على دوره ويخليه يقرأها قبله، من باب الرحمة وكرم الأخلاق وعشان ربنا يحبك والله يحب المحسنين زي مانت حافظ.
6- 📚اللهو والضحك مع اخوة اثناء التسميع.
طالما مش سخرية من ألفاظ القرآن ولا استهزاء, اتركهم يضحكوا طالما لا يمنهعم او يعطلهم عن حفظ القرآن.
7- 📚 التأخير في الورد.
أخروا وِردهم لحد بالليل فخلصوه قبل معاد نومهم بنص ساعة وعاوزين يلعبوا الساعتين بتوعهم على التابلت؟
بمنتهى الهدوء والثبات هتقول لهم: مش مشكلتي خالص، أنا نبهتكم كتير إن دة هيحصل ونصحتكم دايما تبدأوا يومكم بالورد قبل أي حاجة، اتحملوا نتيجة اختياركم.
يمكن التغاضي وتركهم ساعة اضافية مثلا مرة.
8- 📚 التشتيت واللعب اثناء التسميع.
بيحب يتحرك كتير أويلعب كورة وهو بيسمّع وهكذا.
حاول تحط نفسك مكانه وتفهم هل فعلا مش بيعرف يركز غير وهو بيتحرك, خلاص اسمح له يتحرك ويلف في دايرة مثلا أو يتمشى قدامك وهو بيسمّع، وفهمه إن كورة ولعب لأ وإحنا بنقرأ كلام الله من باب تعظيم شعائر الله وفهمه كيف نلعب وإحنا بنقرأ، في حين إن كلام الله لما كان بينزل على النبي كان بيجد شدّة ويقعد يرتجف ويتعرق من عظم الأمر؟... وفكره بالآية "إنا سنلقي عليك قولا ثقيلا" .
لو الطفل أصغر من 5 سنوات لايوجد مانع يمسك عربيته أومكعباته ويلعب هو قاعد بيسمّع, المهم الحاجة اللي بتخليه يركز نحاول نتفهمها ونتفاوض بالمتاح.